Tajga tusschn de Muskwa-Bergn en 't Grôot Sleevie-Mêer
De tajga tusschn de Muskwa-Bergn en 't Grôot Sleevie-Mêer, geleegn in Kanada, zyn 'n ekostreeke uut d' ekozôone Nearctis vôgnst de Weirld Nateur-Stichtienge (WWF) [1]. Ze maakn dêel uut van 't bioom de boreoale busschn of de tajga. D' ippervlakte van d' ekostreeke besloa 26 236 579 êktoarn [2][3][4]. Vo de grôote ekoloogiesche rykdom is d' ekostreeke e dêel van de Global 200-streeke de "tajga tusschn de Muskwa-Bergn en 't Grôot Sleevie-Mêer".
Beschryvienge
[bewerkn | brontekst bewerken]Die ekostreeke is te vienn in nôordwestlik Alberta, nôordôostlik Britsch Koluumbja en e grôot stik van 't zuudwestn van de Nôordwestlikke Gebiedn roend de Mackenzie-Valleeje, vanof de Muskwa-Bergn toe an 't Grôot Sleevie-Mêer woanoa dat d' ekostreeke genoamd is. Byzoendre gebiedn sluutn 't boreoal bus in ten ôostn van de Mackenzie-Rieviere (tusschn Mackenzie-Bergn en Franklin-Bergn; 't land lanst de Horn-Rieviere an de westkant van de Mackenzie; 't bekkn van de Liard-Rieviere; en de Karieboe-Bergn in nôord-sentroal Alberta.
't Landschap bestoat uut brêe platte vlaktn en lêeglandn oendrbrookn deur bergn en oogvlaktn, lik de Karieboe-Bergn. Bykans den êft van 't gebied is bedekt mê moerassn en veenn lik Zama-Mêer in Alberta. D' ekostreeke is in de zôone van nie-aanêensluutnd permafrost en êt 'n subarktiesch kliemoat, mê zoomre-temprateurn mêt e gemiddelde roend 12,5 °C, en wientre-temprateurn mêt e gemiddelde van -18 °C toe -24,5 °C. De joarliksche gemiddelde temprateurn zyn tusschn -2,0 °C en -6,5 °C. De neerslag is taamlik lêege, mêt e gemiddelde tusschn 250 mm en 500 mm.
Plantn-weirld
[bewerkn | brontekst bewerken]
De vegetoasje bestoat oofdzoaklik uut dichte busschn van Ameriekoansche roatlpopliere (Populus tremuloides), witte sparre (Picea glauca) en boalsm-denne (Abies balsamea), mê klindre populoasjes van boalsm-popliere (Populus balsamifera), zwarte sparre (Picea mariana) en berke.
Bêestn-weirld
[bewerkn | brontekst bewerken]Die ekostreeke êrbergt veele wilde bêestn woaroendre grôote kuddn (van duuznde stiks) van roendtrekknde bus-karieboe (Rangifer tarandus caribou) en andre grôote zoogbêestn lik eeland (Alces alces), biezong (Bison bison athabascae) (Wood Buffalo National Park is in die streeke), wapietie (Cervus canadensis) en muul-êrte (Odocoileus hemonius) tegoare mê klindre bêestn lik snêewschoe-oaze (Lepus americanus). De roofbêestn die undre voedn mê aal da wild zyn de Kanadeesche lynx (Lynx canadensis), de grizzly-beir (Ursos arctos horriblus), d' Ameriekoansche zwarte beir (Ursus americanus) en de grysde wolf (Canis lupus). Veugls omvattn de woatre-veugls van de veele moerassn en prèèrie-veugls lik de ruugpôot-oendrs (Tetraoninae).
Bedreigiengn en beschermienge
[bewerkn | brontekst bewerken]
Die ekostreeke is goed bewoard, mêt e geschat 75% da nog oengerêpt is. Beschermde gebiedn bevattn westlikke dêeln van Nasjonoal Park Wood Buffalo in nôordlik Alberta, 't zuudlik midden van de Nôordwestlikke Gebiedn, en Maxhamish Lake Provincial Park en andre beschermde gebiedn in nôordôostlik Britsch Koluumbja. Kappn van de busschn is de grotste bedreigienge vo d' ekoloogiesche weirde van de streeke tegoare mê de meuglikeedn vo myn-uutboatienge, d' uutwerkienge van de Mackenzie-ootostroade en oolje-puuplynn.
Zied ook noa
[bewerkn | brontekst bewerken]| Boreoale busschn uut 't Nearctis | |
|---|---|
| NA0601 Boreoale bergbusschn van 't Alaska-Schiereiland | Alaska (USA) |
| NA0602 Busschn van 't sentroal Kanadeesch Schild | Kanada |
| NA0603 Boreoale busschn roend de Cook-Golve | Alaska (USA) |
| NA0604 Boreoale busschn van de Koopre-Ôogvlakte | Alaska (USA) |
| NA0605 Boreoale busschn in ôostlik Kanada | Kanada |
| NA0606 Tajga van 't ôostlik Kanadeesch Schild | Kanada |
| NA0607 Vlakte-tajga van Binn-Alaska en Joekon | Kanada/USA |
| NA0608 Busschn van sentroal Kanada | Kanada |
| NA0609 Busschn van 't westlik Kanadeesch Schild | Kanada |
| NA0610 Tajga tusschn de Muskwa-Bergn en 't Grôot Sleevie-Mêer | Kanada |
| NA0611 Busschn van d' ooglandn van Newfoundland | Kanada |
| NA0612 Busschn van 't nôordlik Kanadeesch Schild | Kanada |
| NA0613 Busschn van de nôordlikke Kordieleera | Kanada |
| NA0614 Tajga van de Nôordwestlikke Gebiedn | Kanada |
| NA0615 Woestenyn an de kustn van de schiereilandn Avalon en Burin | Kanada |
| NA0616 Tajga an de zuudlikke Hudson-Boaje | Kanada |
| NA0617 Drooge busschn van 't binneland van Joekon | Kanada |
Eksterne koppliengn
[bewerkn | brontekst bewerken]- (en) Muskwa-Slave Lake forests (The Encyclopedia of Earth).
- (en) Global ecoregion nr 81 : Muskwa-Slave Lake Boreal Forests (WWF).
Verwyziengn
[bewerkn | brontekst bewerken]<references>