Tajga van 't ôostlik Kanadeesch Schild

Van Wikipedia
Naar navigatie springen Naar zoeken springen
Dat artikel es geschreevn in 't Noordelik West-Vlams.

Liggienge van d' ekostreeke in Nôord-Amerika.
Liggienge van de boreoale busschn in de weirld.

De tajga van 't Ôostlik Kanadeesch Schild, is 'n ekostreeke uut d' ekozôone Nearctis vôgnst de Weirld Nateur-Stichtienge (WWF). D' ippervlakte van d' ekostreeke besloat 753 800 km² [1][2][3]. Ze makt dêel uut van 't bioom de boreoale busschn of de tajga. Vo de grôote ekoloogiesche rykdom is d' ekostreeke e dêel van de Global 200-streeke de "Kanadeesche boreoale busschn".

Beschryvienge[bewerkn | brontekst bewerken]

Geleegn in nordôostlik Kanada, oovredekt die ekostreeke e grôot stik van nôordlik Kebêk en 't mêeste van Labrador, rêeknde van de Hudson-Boaje en Djeems-Boaje in 't Westn, oovre Ungava-Boaje en in 't Ôostn toe an d' Atlantiesche Oseoane an de kuste van Labrador. 't Is e tajga-ekostreeke en ze stopt bygevôg an de boom-grenze, woada de toendra begunt. 't Landschap is ruuw en rotsig mêt e gebied van fjordn an d' Atlantiesche kuste van Labrador. D' euvls en oogvlaktn zyn deurspêkt mê veele mêern en veen-moerassn en plekkn toendra in de Mealy Mountains en eldrs.

't Is e koed dêel van de weirld mêt e gemiddelde joarliksche temprateure die goa van -6 °C in Hudson-Boaje toe 1 °C ip de kuste van Labrador [4].

Plantn-weirld[bewerkn | brontekst bewerken]

Tajga by Nain, Labrador.

D' oovrêersnde boomn uut de boreoale busschn zyn zwarte sparre (Picea mariana) en moeras-lorke (Larix laricina), gemiengld mê klêene antalln witte sparre (Picea glauca), dwergberkn, wilgn, Lauraceae, en rododendrons. In de veenn gruujn dr Cyperaceae en Sphagnum-mos.

Bêestn-weirld[bewerkn | brontekst bewerken]

D' ekostreeke êrbergt veele wilde bêestn woaroendre bus-karieboe (Rangifer tarandus caribou), eeland (Alces alces), Ameriekoansche zwarte beir (Ursus americanus), grysde wolf (Canis lupus), rôo vos (Vulpes vulpes), poolvos (Alopex lagopus), veelvroate (Gulo gulo), snêewschoe-oaze (Lepus americanus), en koloonjes van zêe-oendn. Van byzoendr belank zyn de geweune zêe-oendn (Phoca vitulina) van 't zôetwoatre van 't Mêer van de Zêe-oendn en de grotste kudde van bus-karieboe van de weirld, de kudde van 400 000 bêestn van Zjorsj-Rieviere. Veugls omvattn de ruugpôot-oendrs (Tetraoninae), vis-oarnd (Pandion haliaetus), roave (Corvus corax) en veele woatr-veugls. In 't byzoendre lanst de rotsige kuste istr platse vo de broednde koloonjes zêeveugls, woaroendre de bedreigde ôostlikke populoasje van de harlekyn-eende (Histrionicus histrionicus). 't Gebied ligt ook ip den Atlantiesche miegroasje-vliegroete vo veugls.

Bedreigiengn en beschermienge[bewerkn | brontekst bewerken]

Die ekostreeke is bykans nog hêel in zyn nateurlikke stoat, mêt uutzoendrienge van sommigte gebiedn die ofgezien ên van woatrkracht-installoasjes en van mynbow-aktievieteitn lik de Myne van Voisey-Boaje. Dr zyn gin echte beschermde gebiedn oewêl da 't vôorngestelde Nasjonoal Park van de Mealy Mountains 't grotste park zoe wordn in Atlantiesche Kanada. Andre parkn zyn vôorngesteld vo Richmond-Golve en de Clearwater Lakes ip Hudson-Boaje, en 't Mêer Atikonak ip de grenze van Kebêk en Labrador.

Zied ook noa[bewerkn | brontekst bewerken]

Boreoale busschn uut 't Nearctis
NA0601 Boreoale bergbusschn van 't Alaska-Schiereiland Alaska (USA)
NA0602 Busschn van 't sentroal Kanadeesch Schild Kanada
NA0603 Boreoale busschn roend de Cook-Golve Alaska (USA)
NA0604 Boreoale busschn van de Koopre-Ôogvlakte Alaska (USA)
NA0605 Boreoale busschn in ôostlik Kanada Kanada
NA0606 Tajga van 't ôostlik Kanadeesch Schild Kanada
NA0607 Vlakte-tajga van Binn-Alaska en Joekon Kanada/USA
NA0608 Busschn van sentroal Kanada Kanada
NA0609 Busschn van 't westlik Kanadeesch Schild Kanada
NA0610 Tajga tusschn de Muskwa-Bergn en 't Grôot Sleevie-Mêer Kanada
NA0611 Busschn van d' ooglandn van Newfoundland Kanada
NA0612 Busschn van 't nôordlik Kanadeesch Schild Kanada
NA0613 Busschn van de nôordlikke Kordieleera Kanada
NA0614 Tajga van de Nôordwestlikke Gebiedn Kanada
NA0615 Woestenyn an de kustn van de schiereilandn Avalon en Burin Kanada
NA0616 Tajga an de zuudlikke Hudson-Boaje Kanada
NA0617 Drooge busschn van 't binneland van Joekon Kanada


Eksterne koppliengn[bewerkn | brontekst bewerken]

Verwyziengn[bewerkn | brontekst bewerken]

<references>

  1. (en) Ecoregion NA0606 : Eastern Canadian Shield taiga (WWF).
  2. (en) Ecoregion NA0606 : Eastern Canadian Shield taiga (Nationalgeografic).
  3. (en) Ecoregion NA0606 : Eastern Canadian Shield taiga (Global Species).
  4. (en) Ecoregion NA0606 : Eastern Canadian forests (WWF).