Tajga an de zuudlikke Hudson-Boaje
De tajga an de zuudlikke Hudson-Boaje is 'n ekostreeke uut d' ekozôone Nearctis vôgnst de Weirld Nateur-Stichtienge (WWF). D' ippervlakte van d' ekostreeke besloa 37 373 528 êktoarn [1]. De busschn maakn dêel uut van 't bioom de boreoale busschn of de tajga van nôordlik Kanada [2][3].
Beschryvienge
[bewerkn | brontekst bewerken]Die ekostreeke bezet de lêeggeleegn gebiedn an de zuudkant van de Hudson-Boaje en de Djeems-Boaje. Ze ligt in 't nôordwestn van Manitoba, oovre hêel 't nôordn van Ontario en toe an 't ôostn van de Djeems-Boaje in Kebêk. Z' omvat ook 't Akimiski-Eiland in Nunavut.
De joarliksche gemiddelde temprateure ligt tusschn -2⁰C en -5⁰C. De gemiddelde zoomre-temprateure varjeert van 10,5⁰C toe 11,5⁰C en de gemiddelde wientre-temprateure van -16⁰C toe -19⁰C. De joarliksche neerslag is tusschn 400 mm in 't uuterste nôordn toe 700 mm of 800 mm in 't uuterste ôostn.
Plantn-weirld
[bewerkn | brontekst bewerken]Gedroengn zwarte sparre (Picea mariana) en moeras-lorke (Larix laricina) oovrêersn ier de vegetoasje. Die boomn wordn grotre en 't bus wordt dichtre no 't zuudn toe. De struukloage bestoat uut dwergberke (Betula spp.), wilge (Salix spp.), en Ledum decumbens. Slicht ofgewoatrde gebiedn êrbergn bedekkiengn van syprgrassn (Carex spp.), mossn en korstmossn, en d' ooge strangn ên 'n ipvollnd patrôon van ofwisslnd kammn mê zwarte sparre en inzienkiengn van vêenn en venn. 't Gebied te zuudn van Djeems-Boaje vormt 'n oovregank tusschn de gemienglde koniefeerebusschn van 't zuudn en de toendra no 't nôordn, en êt lik zôdoanig 'n grotre sôortnverschiddneid, woaroendre boalsm-denne (Abies balsamea), witte sparre (Picea glauca) en zwarte sparre, Ameriekoansche roatlpopliere (Populus tremuloides), en papierberke (Betula papyrifera). Moerassn moakn 50-75 persentn uut van die ekostreeke.
Bêestn-weirld
[bewerkn | brontekst bewerken]Typiesche wilde bêestn zyn karieboe (Rangifer tarandus), snêewganze (Chen caerulenscens), Kanadeesche ganze (Branta canadensis) en snêewschoe-oaze (Lepus americanus) in hêel d' ekostreeke. Ysbeir (Ursus maritimus), poolvos (Alopex lagopus), fluutzwoane (Cygnus columbianus), zêe-eendn, woadveugls, witte dolfyne (Delphinapterus leucas) en zêe-oendn (Phocidae) zyn te vienn lanst de kuste van de Hudson-Boaje. Moeras-snêew-oene (Lagopus lagopus) leeft te zuudn van de kuste van de Hudson-Boaje. Roend de Djeems-Boaje istr Ameriekoansche zwarte beir (Ursus americanus), wolf (Canis lupus), eeland (Alces alces), Kanadeesche lynx (Lynx canadensis), kroage-oene (Bonasa umbellus) en Ameriekoansche zwarte eende (Anas rubripes).
Bedreigiengn en beschermienge
[bewerkn | brontekst bewerken]Dr wordt aangenoomn da 99 % van d' ekostreeke nog oengerept is.
Zied ook noa
[bewerkn | brontekst bewerken]| Boreoale busschn uut 't Nearctis | |
|---|---|
| NA0601 Boreoale bergbusschn van 't Alaska-Schiereiland | Alaska (USA) |
| NA0602 Busschn van 't sentroal Kanadeesch Schild | Kanada |
| NA0603 Boreoale busschn roend de Cook-Golve | Alaska (USA) |
| NA0604 Boreoale busschn van de Koopre-Ôogvlakte | Alaska (USA) |
| NA0605 Boreoale busschn in ôostlik Kanada | Kanada |
| NA0606 Tajga van 't ôostlik Kanadeesch Schild | Kanada |
| NA0607 Vlakte-tajga van Binn-Alaska en Joekon | Kanada/USA |
| NA0608 Busschn van sentroal Kanada | Kanada |
| NA0609 Busschn van 't westlik Kanadeesch Schild | Kanada |
| NA0610 Tajga tusschn de Muskwa-Bergn en 't Grôot Sleevie-Mêer | Kanada |
| NA0611 Busschn van d' ooglandn van Newfoundland | Kanada |
| NA0612 Busschn van 't nôordlik Kanadeesch Schild | Kanada |
| NA0613 Busschn van de nôordlikke Kordieleera | Kanada |
| NA0614 Tajga van de Nôordwestlikke Gebiedn | Kanada |
| NA0615 Woestenyn an de kustn van de schiereilandn Avalon en Burin | Kanada |
| NA0616 Tajga an de zuudlikke Hudson-Boaje | Kanada |
| NA0617 Drooge busschn van 't binneland van Joekon | Kanada |
Eksterne koppliengn
[bewerkn | brontekst bewerken]- (en) Southern Hudson Bay taiga (The Encyclopedia of Earth).
- (en) Hudson Bay (The Encyclopedia of Earth).